Dan l-avveniment għadda

L-ewwel film ta' Pauline Loquès bħala direttriċi, li kellu l-premiere tiegħu fil-ġimgħa tal-Kritikai fil-Festival ta' Cannes, huwa ta’  ġieħ għall-aqwa żmien tal-French New Wave, b'referenza sottili għal Cléo de 5 à 7 ta' Agnès Varda. Théodore Pellerin, wieħed mill-aktar atturi żgħażagħ promettenti tal-mument, li rebaħ il-Louis Roederer Foundation Rising Star Award f'Cannes is-sena li għaddiet u l-premju César għall-Aħjar Attur Emerġenti din is-sena, jagħti interpretazzjoni profonda u sensittiva fil-karattru ta' Nino.

Nhar ta' Ġimgħa filgħodu, Nino jattendi appuntament mat-tabib, fejn jingħata aħbar li tbiddel ħajtu: għandu kanċer fil-gerżuma. It-trattament għandu jibda nhar it-Tnejn filgħodu, iżda hemm ċans kbir li dan iħallih infertili. Għalhekk, it-tabib jagħtih parir biex jikkunsidra jiffriża l-isperma tiegħu, f'każ li fil-futur jixtieq ikollu t-tfal.

Imħawwad bid-dijanjosi, lejlet id-29 sena tiegħu, u qatt ma kellu jaħseb qabel jekk riedx isir missier, Nino jitlaq mill-isptar konfuż u mingħajr ma jaf x'għandu jagħmel.

Meta b'kumbinazzjoni jiltaqa' ma' ħabib antik tal-iskola li jqajjem emozzjonijiet li kien ilu jżomm misturin, jibda vjaġġ ta' riflessjoni personali. Matul tmiem il-ġimgħa, jimxi fit-toroq ta' Pariġi u jkun imġiegħel jaffaċċja l-passat u l-preżent tiegħu, filwaqt li jerġa' jgħaqqad ir-relazzjonijiet mal-ħbieb, mal-familja u, fuq kollox, miegħu nnifsu.