Young Mothers

L-aħwa Dardenne jerġgħu juru lill-udjenzi il-vera stampa li tmiss il-qalb tal-ħajja reali b’film drama soċjo-realistiku reċenti tagħhom Young Mothers, li rebaħ il-premju Best Screenplay Prize f’Cannes aktar kmieni din is-sena.

Il-qofol tal-film jitratta fuq ħames ommijiet adoloxxenti li jgħixu flimkien f’dar ta’ appoġġ għall-ommijiet fil-Belġju, fejn jintwera ċar l-isfidi li jiffaċċjaw dawn in-nisa żgħażagħ li jgħixu fuq jew viċin il-marġini tas-soċjetà. Id-diretturi qattgħu żmien f’waħda minn dawn il-faċilitajiet immexxija mill-istat fil-pajjiż tagħhom biex jirriċerkaw kif taħdem, in-nies li jibbenifikaw u l-ħaddiema soċjali li jagħmluha possibbli, b’hekk ikollhom referenza realistika kontinwa. L-għarfien fil-fond tagħhom dwar is-suġġett u l-approċċ mimli kompassjoni lejn in-nies li qed jirrappreżentaw jirriżulta f’film li mhux biss jolqot fil-fond, iżda li hu wkoll dettaljat, simpatetiku u sfumat.

Mill-vizzju tad-droga sa sitwazzjonijiet ta’ għajxien prekarju, dawn in-nisa jridu jiffaċċjaw l-isfidi tas-sitwazzjoni tagħhom individwalment, iżda l-għixien flimkien f’din id-dar komunitarja jagħtihom l-għodda, l-appoġġ u l-komunità li għandhom bżonn biex jagħmlu dan.